Innozente e felizze, in su trainu
De sa vida t’avanzas sorre amada,
Pro te male in su mundu non bind’ada
Tottu rosas ti paret su camminu.
Tue che mariposa delicada,
Chi olat in sos fiores de giardinu,
Andasa surridinde a su destinu
De dubbios e de penas non turbada.
Rie Michela mia in cust’edade,
In cust’edade fatta pro gosare.
Ma tue puru sa malinzidade
De su mundu des bider e provare,
Ca passat lestra sa felizzidade
Cale candida vela in virde mare.
