Duos annos a oe ses naschidu
Peppinu meu in s’odorosu magiu;
duos annos a oe cale ragiu
de lughe noa a domo ses benidu.
E mamma tua sutta sos dolores
de su passu penosu t’hat miradu,
cun su fronte de gioia veladu
cun sos oios pienos de ardores.
Deo lizu donosu in custas manos,
chi tribaglian forte dogni die,
leadu t’hapo in brazzos rie rie,
mustrendedi a muntagnas e pianos.
Pro ch’essent bidu sa forza novella
chi de sas carres nostras fit bessida
tottu dibile ancora e isturdida
ma cun sos oios a sa vida bella…
Avvia cumpagna cara! Etta su inu
de sa ingighedda nostra! A sa salude
eo buffo cuntentu, a sa virtude,
de su nostru simpaticu Peppinu.
