Salude Sardigna cara! o terra mia,
Mamma d’omines fortes, berritados,
De pianos e montes desolados,
De bellas fèmminas e de poesia.
Una die che perla ses cumparta
Subra sos mares ricca d’onzi incantu
E curreit de te su dulche vantu
De sa fama, che vela in mar’isparta.
Fin gigantes sos òmines e sas terras
Fruttos daian caros che i s’oro,
E in su mundu no b’aiat coro
Chi no esset bramadu cuddas serras
De Gennargentu mannu e de Limbara
O sas baddes de Tirsu e Flumendosa.
E tue che una dea gloriosa
Subra sas abas risplendias giara.
Dae tando passein longos annos
E tue rutta in bassu tantu sese
Tue lizu de principes e Rese,
Rutta che Cristos sutta sos affannos.
Ma non t’avviles! pes’alta sa testa
Sardigna mia! e mira in altu mira,
Pustis de tantu dolu e de tant’ira
Est tempus chi pro te puru siet festa.
Sos buscos tuos ti lo s’han distruttos
Cun piccones cun serras e istrales,
Han’ingrassadu sos continentales
E tue ses restada senza fruttos.
A tie sempre sos impiegados
Chi tentu han fama ’e falsos e ladrones
Ca sempre han giutu custos berrittones
Che unu tazzu de boês domados.
E has pagadu a sa muda donzi tassa
Populu sardu avvesu a obbedire
Cun su coro siccadu in su patire,
Cun su coro siccadu che pabassa!
Ma coraggiu, coraggiu! ateros coros
Oe Sardigna t’animan sas biddas
Como su mortu fogu ettat chinchiddas
Chi altas lughen’in tottu sos oros
De custu mare ch’ispettat serenu
Sa tua fortuna; e sied’issa accanta
Pro te patria mia o terra Santa
Tenta sempre in penuria e in frenu.
Sos fizos tuos giovanos e bellos
Ardimentosos, giaman libertade
E giustizia e donzi bontade
Subra d’antigos odios rebellos.
E issos Patria a tie ti den dare
Donz’umana potenzia e fortuna
Gloriosa, comente dat sa luna
Sa lughe a su serenu tuo mare.
