Vintisett’annos faghet ses naschidu
cando giovanu ancora deo fia
e tue, ramu de s’alvure mia,
in su magiu odorosu has fioridu.
Como no hapo cussa vigoria,
ma tue ses un’omine cumpridu
e sas forzas chi deo hapo perdidu,
faghen bella sa tua giovania.
Deus t’assistat cun dogni manera,
ma sies virtuosu e diligente
de s’onestade sighi sa bandera
E pro su giustu no nde timas zente
ma sies che soldadu in sa trincera,
pro sas causas bonas cumbattente.
