Incurante a su currer de sos annos
Istas nuraghe brunu in cuss’altura,
Cun sa misteriosa custruttura
Segretu pro sos ingegnos pius mannos.
Ses tue una mortale sepultura
Giusta riparadora de affannos?
O pro gustu de barbaros tirannos
T’han fattu gai inutile figura?
S’omine dottu benit a chircare
Sa singulare tua antiga istoria
E ti chered’attentu istudiare.
Ma invanu s’isforzat sa memoria
Prite ses mudu a dogn’interrogare
Monumentu de viziu o de gloria.
