Da’ue non si torrat ses benidu
né ischis cando torras a partire,
su die ch’has a morrer senz’ischire,
comente senz’ischire ses naschidu.
T’hat su grande misteru partoridu
e casi misteriosu est su vivire,
ca tra filare, tesser’e ordire
nemos sa tela propria hat cumpridu.
Restad’in dogni coro s’amaresa
de non haer su tempus impleadu
nè bene profittadu ’e sa sorte.
Pensende in custu, arrivat sa ezzesa
e in cussu penosu e trist’istadu,
ecco misteriosa enit sa morte.
